G‘alla yig‘im-terimiga puxta hozirlik ko‘rilmoqda

Dalalarda g‘alla baravj o‘sib, o‘rim-yig‘im mavsumi boshlanishidan darak berayotir. Yaqin kunlarda boshlanajak mavsumga esa puxta hozirlik ko‘rib, zarur texnikalarni tayyorlash lozim. Shu maqsadda soha mutasaddilari ishtirokida mavsumga tayyorgarlik jarayonlariga bag‘ishlangan onlayn amaliy seminar bo‘lib o‘tdi.
Unda Surxondaryo viloyat hokimi Ulug‘bek Qosimov rahbarligida barcha tumanlar onlayn tarzda ishtirok etishdi. Aytish kerakki, joriy yilda g‘alla yig‘im-terimini boshlash uchun tumanimizda 10 ta otryad shakllantirilib, 21 ta kombayn, 75 ta don tashuvchi transport vositalari shay holatga keltirilgan. Shuningdek, mavsum boshlanishi oldidan esa har bir kombayn mexanizatorlariga pul mablag‘i va boshqa oziq-ovqat mahsulotlari topshirildi.
2024-yilda Bandixon tumanida 4 ming 688 gektar yer maydonidan 14 ming 533 tonna g‘allani nes-nobud qilmasdan yig‘ib-terib olish reja qilingan. Seminar davomida jonliq so‘yilib, g‘alla mavsumining barakali o‘tishi uchun yaxshi niyatlar ila Qur’on tilovat qilinib, duoga qo‘l ochildi.