Orzular alanga olsa…

Uchuvchi, harbiy bo‘lish har bir insonning bolalikdagi orzusi sanaladi. Ammo, hamma ham bu orzuni ro‘yobga chiqaravermaydi. Turmush tashvishlari, hayotning ikir-chikirlari bunga yo‘l qo‘ymaydi. Yoki vaqt o‘tib, qiziqishlarimiz, maqsadlarimiz o‘zgaradi. Ammo, bolalik orzusini ro‘yobga chiqaradiganlar ham bor.
O‘zbekiston Respublikasi Qurolli Kuchlari tashkil etilganligining 32-yilligi hamda 14-yanvar — “Vatan himoyachilari kuni” munosabati bilan Sho‘rchi tumanidagi ixtisoslashtirilgan maktabida “Vatanni himoya qilish muqaddas burch” mavzusida tadbir tashkil etildi. Tadbirda Mudofa vazirligiga qarashli 36691-sonli harbiy qismning askar va ofitserlarining chiqishlari davomida ular aynan bolalik orzularini ro‘yobga chiqarganliklarini e’tirof etishdi. Bu albatta, o‘quvchi-yoshlarni befarq qoldirmadi va ularni ham orzu qilishdan to‘xtamaslik kerakligini uqtirgandek bo‘ldi.
Ayni tomoshalarni, harbiy akalari egnidagi harbiylik libosini ko‘rib-kuzatib turgan bolalarning qalbida ham sohaga qiziqish va mehr uyg‘ongan, harbiy bo‘lish orzusi tug‘ilgan bo‘lsa, ajab emas.