Moda deganda eng so‘nggi bichimdagi liboslarni tushunishadi. Aslida esa o‘zimizga yarashgan, qomatimizga qolipday mos tushib, tashqi ko‘rinishimizga yanada joziba qo‘shgan libosnigina urfda deyish mumkin. Qolaversa, libosni to‘ldiruvchi qo‘shimcha aksesuarlar ham egnimizdagi kiyimga hamohang bo‘lib, bir-birini to‘ldirishi lozim. Qiziriq tumani 2-umumiy o‘rta ta’lim maktabida tashkil etilgan “Liboslar dizayni” to‘garagidagi har bir darsda bichish-tikish bilan birga ana shunday jihatlar ham o‘rgatib boriladi.
To‘garak rahbari G.Jo‘rayevaning o‘rgatganlari esa shogirdlariga manzur bo‘lganidan, kun sayin ularning soni ortib bormoqda.
Yana bir gap, kiyim tikishda bir xil dizayndagi ko‘ylak barcha qomatga ham mos tushavermasligi mumkin. Shu jihatdan ham tikuvchi-dizayner buyurtma berish uchun kelgan mijozning tashqi ko‘rinishi, qomatiga qarab qandaydir dizayndagi libosni tavsiya qilishi lozim. Shu ma’noda to‘garak rahbari navbatdagi darsida “Qomat tuzilishiga qarab oddiy va murakkab liboslar dizaynini yaratish” mavzusida mashg‘ulot o‘tdi. Chevarlikka mehri bo‘lakcha qizlar esa qomat tuzilishiga qarab oddiy va murakkab liboslar dizaynini yaratishni bilib oldilar.
H.Kamolova
