Oilalar ajrashishganda arsh larzaga keladi deyishadi. Haqiqatan ham ikkiga bo‘lingan yarim jonlar, ota yoki onasini tanlashda qiynalayotgan norasida go‘daklarning mo‘ltirab boqishlarini ta’riflashning o‘zi dahshatli. Mana shunday dahshatlarning oldini olish maqsadida Uzun tumanida oilalarni mustahkamlash, notinch oilalardagi muammo va nizolarni bartaraf etish, ajrashish ostonasida turgan oilalarni yarashtirish masalalariga bag‘ishlangan tadbir bo‘lib o‘tdi.
Ajrashayotgan oilaning bittasi ham ko‘p. jamiyat hayoti uchun katta muammo. Afsuski, jar yoqasiga kelib qolgan oilalarning 12 tasi kun tartibidagi masala sifatida tumandagi 1-sektor hudidudidagi “Obod yurt” mahallasi madaniyat uyida muhokamaga qo‘yildi. Mas’ullarning sa’y-harakati, yoshi ulug‘larning nasihatlari bilan “Dehqon” mahallasidan Abdullayevlar hamda Mo‘minovlar oilasi, “Obod yurt” mahallasidan Allaberdiyevlar oilasi yarashtirildi. Quvonarlisi, 4 nafar bolaga endi tirik yetim tamg‘asi qo‘yilmaydi. Qolganlarga esa yarashgan oilalar ibrat va namuna qilib ko‘rsatildi. Zora, ular ham arshni larzaga keltirguvchi qarorlaridan qaytishsa…
H.Baxtiyorova
