Qoraqalpog‘iston Respublikasining Taxiatosh tumanida Surxondaryo viloyati tajribasi asosida bir qator investitsiya loyihalari amalga oshirilmoqda. Ushbu tashabbuslar tadbirkorlikni rivojlantirish, aholi daromadlarini oshirish va yangi ish o‘rinlarini yaratishga qaratilgan.
Viloyat hokimi Ulug‘bek Qosimov boshchiligida tuman va shahar hokimlari Taxiatosh tumani mahallalarida amalga oshirilayotgan ishlar bilan tanishdi. Jumladan, «Yoshlar sanoat zonasi», qulupnay yetishtirish loyihasi, zamonaviy sport majmuasi hamda aholini toza ichimlik suvi bilan ta’minlashga qaratilgan oilaviy tadbirkorlik tashabbusi ko‘zdan kechirildi.
Umumiy qiymati 17 milliard so‘m bo‘lgan mazkur loyihalar hududda iqtisodiy faollikni oshirish, aholi uchun qo‘shimcha daromad manbalarini shakllantirish va yashash sharoitlarini yaxshilashga xizmat qiladi.
2026–2027-yillardagi loyihalar doirasida Taxiatosh tumanida 110 ta yangi ish o‘rni yaratish rejalashtirilgan. Bu esa tashabbuslarning nafaqat tadbirkorlikni kengaytirish, balki aholi bandligini ta’minlashda ham muhim ahamiyat kasb etishini ko‘rsatadi.
