Kitob insoniyat taraqqiyotining eng muhim manbalaridan biri hisoblanadi. Kutubxonalar esa ushbu bebaho ma’naviy boyliklarni saqlash, targ‘ib qilish va kelajak avlodlarga yetkazishda muhim o‘rin tutadi. Adib Sobir Termiziy nomidagi Surxondaryo viloyat axborot-kutubxona markazi ham viloyat aholisining ma’naviy-ma’rifiy hayotida alohida ahamiyat kasb etadi.
Surxondaryo viloyatidagi ushbu kutubxonaning tarixi uzoq yillarga borib taqaladi. Avvalgi kutubxona binosi 1936-yilda qurilgan bo‘lib, kuniga atigi 32 nafar kitobxonga xizmat ko‘rsatish imkoniyatiga ega edi. Kutubxonada 20 nafar o‘quvchi uchun o‘rin va 10 ta kompyuter mavjud bo‘lgan. O‘sha davrda kutubxona viloyat aholisi uchun asosiy bilim va ma’lumot manbalaridan biri bo‘lib xizmat qilgan.
Yillar davomida kitobxonlar sonining ortishi va zamonaviy axborot texnologiyalariga bo‘lgan ehtiyojning kuchayishi kutubxona faoliyatini yangi bosqichga olib chiqishni talab qildi.
2018-yilda Adib Sobir Termiziy nomidagi axborot-kutubxona markazining zamonaviy binosi foydalanishga topshirildi. Yangi markaz kuniga 2000 nafargacha kitobxonga xizmat ko‘rsatish imkoniyatiga ega. Binoda zamonaviy kompyuter zallari, elektron kataloglar, Wi-Fi hududlari, huquqiy axborot zali, umumiy o‘quv zallari hamda o‘quv markazi tashkil etilgan.
Bugungi kunda markaz kitobxonlarga an’anaviy va elektron resurslardan foydalanish, internet xizmatlari, elektron kataloglar orqali adabiyotlarni qidirish hamda turli ma’rifiy tadbirlarda ishtirok etish imkoniyatlarini yaratib bermoqda. Kutubxona nafaqat kitob o‘qish maskani, balki zamonaviy bilim va axborot markaziga aylangan.
Mazkur axborot-kutubxona markazi yoshlarning bilim olishi, ilmiy izlanishlar olib borishi va bo‘sh vaqtini mazmunli tashkil etishida muhim ahamiyat kasb etmoqda. Shuningdek, markazda turli uchrashuvlar, kitob taqdimotlari, ma’naviy-ma’rifiy tadbirlar va treninglar muntazam ravishda o‘tkaziladi.
Adib Sobir Termiziy nomidagi Surxondaryo viloyat axborot-kutubxona markazi o‘zining boy tarixi va zamonaviy imkoniyatlari bilan viloyatning yirik ma’naviy-ma’rifiy maskanlaridan biri hisoblanadi. Kechagi oddiy kutubxonadan bugungi zamonaviy axborot markazigacha bo‘lgan taraqqiyot yo‘li mamlakatimizda kitobxonlik madaniyatini rivojlantirish va yosh avlodning intellektual salohiyatini oshirishga qaratilgan e’tiborning yorqin namunasidir.
Farangiz Choriyeva,
Adib Sobir Termiziy nomidagi Surxondaryo viloyat axborot-kutubxona
markazi Axborot- texnologiyalari bo‘yicha mutaxassis
