Termiz shahri bilan Qoraqalpog‘istonning Taxiatosh tumani o‘rtasidagi hamkorlik doirasida “Markaziy” mahallasida keng ko‘lamli obodonlashtirish va bunyodkorlik ishlari olib borilmoqda. Shu jarayon bilan tanishish maqsadida Termiz shahri nuroniylari mahallaga tashrif buyurib, hududda amalga oshirilayotgan loyihalarni ko‘zdan kechirdi.
Ayni paytda katta kanal bo‘yidagi sohil hududida aholi va yoshlar uchun kecha-yu kunduz faoliyat yuritadigan xizmat ko‘rsatish ko‘chasi barpo etilmoqda. Bu yerda kafelar, turli xizmat shoxobchalari, yoshlar sayilgohi va xiyobonlar tashkil etilishi rejalashtirilgan. Shuningdek, Surxondaryoning mashhur Sangardak sharsharasi qiyofasini aks ettiruvchi landshaft kompozitsiyasi hamda 10 ta turar joy binosini qurish loyihalari ko‘zda tutilgan.
Nuroniylar qurilish jarayonlari va kelgusidagi rejalar bilan tanishib, hududning yangi qiyofasi aholi uchun qo‘shimcha qulaylik va dam olish imkoniyatlarini yaratishini ta’kidladi. Mazkur ishlar ikki hudud o‘rtasidagi hamkorlikning amaliy natijasi sifatida “Markaziy” mahallasida zamonaviy infratuzilmani shakllantirishga xizmat qilmoqda.
