O‘zbekistonda valyuta kursi va foiz stavkalari o‘zgarishidan kelib chiqadigan moliyaviy xatarlarni kamaytirishga qaratilgan yangi tuzilma tashkil etiladi.
Prezident qaroriga muvofiq, «Valyuta va foiz xatarlarini boshqarish kompaniyasi» AJni 2027-yil 1-martga qadar tashkil etish rejalashtirilgan. Kompaniya banklar, xalqaro moliya institutlari va boshqa tashkilotlar bilan derivativlar bo‘yicha to‘g‘ridan-to‘g‘ri bitimlar tuzishi, shuningdek, valyuta birjasi va birjadan tashqari bozorda chet el valyutasini sotib olish va sotish huquqiga ega bo‘ladi.
Yangi tuzilmaning asosiy vazifasi moliya bozori ishtirokchilari uchun valyuta va foiz stavkalari o‘zgarishi bilan bog‘liq xatarlarni boshqarish mexanizmlarini kengaytirishdan iborat.
