Huquqbuzarlikka chek qo‘yildi

Hamma ham tezda boyishni, maishiy qiyinchiliklarsiz umrguzaronlik qilishni istaydi. Buning uchun albatta, avvalo o‘qish, kasb-hunar o‘rganish, keyin esa sidqidildan mehnat qilish talab etiladi. halol mehnat bilan jamiyatda o‘z o‘rningizni topishingizga, obro‘-e’tibor qozonishingiz nima yetsin. Ammo hamma ham shunday o‘ylarmikan. Ba’zilar xuddi Amerikani kashf etgandek, qandaydir manfur rejalar tuzib, oson yo‘l bilan boyib ketishni, foyda ko‘rishni o‘ylaydi.
Surxondaryo viloyati Ekologiya boshqarmasi, DXX chegara qo‘shinlari hamda viloyat Milliy gvardiya boshqarmasi hamkorligida tashkil etilgan tezkor tadbirlari davomida Sherobod tumanining “Chorbog‘” mahallasidagi tog‘li hududlarda oson yo‘l bilan foyda olishni istagan holda kovrak urug‘ini noqonuniy terib olgan dastlab ikki nafar fuqaro Q.A. hamda E. B. 58 kilogramm kovrak urug‘i bilan, keyingi bosqichda Qashqadaryo viloyatida yashovchi fuqarolar E.O‘. va H.T. “Go‘rdara” massividan 146 kilogramm kovrak urug‘lari bilan qo‘lga tushib, huquqbuzarlik holati aniqlangan.
Hozirda mazkur huquqbuzarlik holati bo‘yicha dastlabki dalolatnomalar rasmiylashtirilib, tabiatga yetkazilgan zarar hisoblanib, huquqni muhofaza qilish organlariga taqdim etish uchun tayyorlanmoqda.