Boysun tumanining barcha mahallalarida oktabr va noyabr oylari davomida hashar hamda obodonlashtirish ishlari olib borilmoqda.
Ushbu tadbirlar milliy qadriyatlarimizni asrab-avaylash, aholi o‘rtasida mehr-oqibat va hamjihatlikni mustahkamlash, hududlarda tozalik va obodlikni ta’minlashga qaratilgan. Jumladan, ko‘chalar, ariqlar va zovurlar, ziyoratgohlar, qabristonlar, muqaddas qadamjolar hamda aholi xonadonlarida tozalik va tartibni ta’minlashga alohida e’tibor qaratilmoqda.
Prezidentimiz rahbarligida 19-sentabr kuni o‘tkazilgan videoselektor yig‘ilishida ham obodonlashtirish ishlari bir martalik tadbir bo‘lib qolmasdan, kundalik hayot tarziga aylanishi zarurligi ta’kidlangan edi.
Zero, hashar — nafaqat hududlarni obod qilish, balki insonlarni ezgu maqsadlar yo‘lida birlashtirish, yosh avlodni mehnatsevarlik va vatanparvarlik ruhida tarbiyalashga xizmat qiladigan qadriyatdir.
