OBODLIK KO‘NGILDAN BOSHLANADI

Maʼlumki xalqimiz maʼnaviyatida, qadriyatlarida boshqa xalqlar o‘rgansa va o‘z tajribasida qo‘llashga arziydigan ko‘pgina ibratli tajribalari mavjud. Masalan, “hashar” deb atalgan tadbir barchani birdamlikka, ahillikka va mehr-oqibatga undashi bilan ajralib turadi. Hashar — bu xalqimizning qadimiy va azaliy qadriyatlaridan biridir. Uning zamirida obodlik, hamjihatlik, mehr-oqibat, xayr-saxovat va bunyodkorlik mujassam. Xususan, Muzrabot tumani hokimligi va tuman IIB tashabbusi bilan tuman markazida hashar uyushtirildi.
Hashar davomida ko‘p qavatli uy atroflari, tashkilot va korxona hududlari, asosiy yo‘l chetlarida obodonlashtirish, tozalash ishlari olib borildi. Obodlikka hissa qo‘shganlarning amalga oshirgan ishlaridan ko‘ngillari ham ravshanlashgandek bo‘ldi. Chunki, obodlik koʼngildan boshlanadi. Zero, obod makonda ish unumli va barakali boʼlish bilan birga obod boʼlgan joyda farovonlik hukm suradi.