Harakat xavfsizligi kuchaytirilmoqda

Yo‘l transport hodisalarining tez-tez sodir bo‘layotgani, ayniqsa, bu hodisalar qurboni bolalar ekani kishini sergaklantirib qo‘yadi. Nahotki, uchar haydovchilarning-da uka-singlisi, farzandi bo‘lmasa?.. aks holda yo‘llarda harakatlanayotganda sergaklikni, mas’uliyatni unutishmasmidi? Ana shunday holatlar kerakli chora-tadbirlarni kuchaytirishni talab etadi. Shu maqsadda Termiz tumani prokuraturasi tashabbusi bilan Ichki ishlar bo‘limi yo‘l harakati xavfsizligi guruhi, Yo‘llardan foydalanish unitar korxonasi va boshqa aloqadar tashkilotlar ko‘magida tuman hududidan o‘tuvchi avtomobil yo‘llarida yo‘l belgilari va svetafor o‘rnatish, piyodalar o‘tish joylari va yo‘l chiziqlarini bo‘yash ishlari amalga oshirilmoqda.
Navbatdagi tadbirlar tumandagi barcha maktablar yaqinidan o‘tuvchi magistral va mahalliy avtomobil yo‘llarida harakat xavfsizligini ta’minlash maqsadida o‘tkazildi. Tadbirlar davomida ushbu hududlardagi yo‘llarda yo‘l belgilarining mavjudlari ta’mirlandi, ayrim joylarga yangidan qo‘yildi hamda piyodalar o‘tish joylari va yo‘l chiziqlari bo‘yalib, aniq ko‘rinarli holatga keltirildi.