Surxondaryoda yangi universitet tashkil etildi

Surxondaryoda ikki institut asosida Termiz davlat muhandislik va agrotexnologiyalar universiteti tashkil etilishi haqida xabar bergan edik. O‘zbekiston Respublikasi Prezidentining “Termiz davlat muhandislik va agrotexnologiyalar universitetini tashkil etish chora-tadbirlari to‘g‘risida”gi qarori qabul qilindi.
Unga ko‘ra, universitetda muhandislik, qishloq xo‘jaligi, ishlab chiqarish va xizmat ko‘rsatish sohalarida hamda hududning oliy ma’lumotli kadrlarga bo‘lgan ehtiyojiga muvofiq oliy ma’lumotli mutaxassislar va ilmiy-pedagog kadrlar tayyorlanadi. 2024/2025-o‘quv yilidan boshlab, Ilg‘or muhandislik maktabi faoliyati tashkil etiladi va yirik ishlab chiqarish korxonalari Universitetning Ilg‘or muhandislik maktabiga sanoat hamkori sifatida biriktiriladi.
Shuningdek, Termiz muhandislik-texnologiya instituti hamda Termiz agrotexnologiyalar va innovatsion rivojlanish institutida tahsil olayotgan barcha talabalar o‘qishini Universitetda davom ettiradi hamda 2024/2025-o‘quv yilidan boshlab bitiruvchi kurs talabalariga belgilangan tartibda Universitet diplomi beriladi. Ha aytgancha, Universitet Termiz muhandislik-texnologiya instituti hamda Termiz agrotexnologiyalar va innovatsion rivojlanish institutining huquq va majburiyatlari bo‘yicha huquqiy vorisi hisoblanadi.