“Yosh gvardiyachilar” sinfi soni ortmoqda

Bolalikdan orzu qilinadigan sohalar yo san’at, yo harbiy yo‘nalishda bo‘ladi. Egniga maxsus libosni kiyib, vatanga xizmat qilish orzusi bilan ulg‘ayadigan yoshlarni yanada ruhlantirish, munosib motivatsiya berish maqsadida maktablarda “Yosh gvardiyachilar” sinflari tashkil etilmoqda. Bunday sinf o‘quvchilari gvardiyachilar libosida yurishlari yanada qiziqishni oshirishga sabab bo‘layotgani sir emas. Termiz tumanidagi 1- hamda 3-sonli umumtaʼlim maktablarida ham “Yosh gvardiyachilar” harbiy vatanparvarlik sinflari tashkil etildi.
Ushbu sinflarning tantanali ochilish marosimida viloyat Maktabgacha va maktab taʼlimi boshqarmasi masʼullari, Milliy gvardiya va Qo‘riqlash boshqarmasi rahbariyati, mahalla faollari, keng jamoatchilik vakillari ishtirok etdilar.
Maktabgacha va maktab taʼlimi boshqarmasi hamda Milliy gvardiya viloyat bo‘yicha boshqarmasi hamkorligida bosqichma-bosqich tashkil etilayotgan bu kabi sinflar yoshlarning harbiy hayotga oid bilim va ko‘nikmalarini mustahkamlab borishlariga xizmat qiladi.