Surxondaryo viloyatida milliy qadriyatlarni tiklashga xizmat qiluvchi yangi tashabbus — “Alla-onalar qo‘shig‘i” loyihasi izchil davom etmoqda. Mazkur loyihaga “Milliy tiklanish” demokratik partiyasi viloyat Kengashi bosh-qosh bo‘lmoqda.
Loyiha doirasida Uzun tumanidagi madaniyat markazida partiyaning “Siyosatchi ayollar” klubi a’zosi bo‘lgan faol xotin-qizlar tomonidan tayyorlangan zamonaviy alla qo‘shiqlari to‘plami keng jamoatchilikka namoyish etildi. Yangi nafasda yangrayotgan ushbu allalar, nafaqat yuraklarga iliqlik baxsh etmoqda, balki yurtimizning boy madaniy merosini avlodlarga yetkazishda muhim vositaga aylanmoqda.
Ushbu tashabbus qadimiy udum – alla aytish an’analarini zamonaviy talqinda tiklash, ona ruhi va mehrini kuylovchi qo‘shiqlar orqali yosh avlodni milliy qadriyatlarga hurmat ruhida tarbiyalashga xizmat qilmoqda. “Alla-onalar qo‘shig‘i” loyihasi nafaqat ayollarning ijtimoiy faolligini oshirish, balki surxondaryoliklarning milliy madaniyat va merosga bo‘lgan e’tiborini kuchaytirishga ham xizmat qilmoqda.
Loyihaning davomiyligi va qamrovi ortib borayotgani — xalqimizning o‘z ildizlariga, milliy musiqiy an’analariga bo‘lgan chuqur hurmati va mehrining yaqqol ifodasidir.
