O‘zbekiston savdo tizimida yangi tartib joriy etildi: yirik savdo markazlari va oziq-ovqat do‘konlariga kirish joylarida iste’mol muddati tugash arafasida bo‘lgan mahsulotlar uchun alohida rastalar tashkil etiladi. Bu — Vazirlar Mahkamasining “Oqilona iste’mol” (Save Food) dasturi doirasidagi qaroriga muvofiq amalga oshirilmoqda.
Yangi tizim orqali isrofgarchilikka chek qo‘yish, oziq-ovqat chiqindilarini kamaytirish va resurslardan oqilona foydalanish maqsad qilingan. Rastadagi mahsulotlar narxi har 10 kunda pasaytirilib boriladi, bu esa aholi uchun hamyonbop xarid imkoniyatini yaratadi. “Oqilona iste’mol” dasturi umumiy ovqatlanish va chakana savdo sohasida barqarorlikni ta’minlashga, ijtimoiy mas’uliyatni oshirishga xizmat qiladi.
Endilikda muddati tugash arafasidagi mahsulotlar yo‘q qilinmaydi, balki belgilangan tartibda sotuvga chiqariladi. Bu amaliyot nafaqat ekologik muammolarni kamaytirishga, balki aholining xarid imkoniyatlarini kengaytirishga ham xizmat qiladi.
