2019-yilda e’lon qilingan yapon tadqiqotiga koʻra, sigirlarga oq-qora naqsh chizish chivinlar hujumi bilan bogʻliq iqtisodiy yoʻqotishlarni kamaytirishga yordam beradi.
11 nafar yaponiyalik olimdan iborat guruh yirik shoxli qoramol bilan bogʻliq tadqiqoti uchun biologiya boʻyicha Shnobel mukofotiga sazovor boʻldi. Ular sigirni zebra kabi boʻyash orqali unga qoʻnadigan hasharotlar soni sezilarli darajada kamayishini koʻrsatgan tajribani oʻtkazgan edi.
Shnobel mukofoti (Ig Nobel Prize) Nobel mukofotiga parodiyadir. U 1991-yildan beri har yili Harvard universitetida ilm-fan va hayotdagi eng «gʻalati, bema’ni, ammo oʻylashga majbur qiladigan» yutuqlar uchun beriladi.
