Irrigatsiya tizimlari nazoratda

Surxondaryo viloyati hokimi Ulug‘bek Qosimov irrigatsiya tarmoqlarida amalga oshirilayotgan ishlar, tizim korxonalari faoliyati bilan tanishish maqsadida Termiz tumanida joylashgan “Surxonnasosta’mir” DUKga tashrif buyurdi. Korxonada yirik nasoslar va irrigatsiya tizimlari jihozlarini ta’mirlash jarayonlarining borishi bilan tanishildi.
Mazkur korxona faoliyati 2023-yilda viloyat hokimining tashabbusi bilan saqlab qolingan edi. Shu yerning o‘zida irrigatsiya tarmoqlarini modernizatsiya qilish, nasos stansiyalarini ta’mirlash, yer resurslaridan samarali foydalanish, talon-toroj qilinishining oldini olish borasidagi ishlar yuzasidan mutasaddilarning axboroti tinglandi.
Shundan so‘ng, viloyat rahbari Muzrabot tumani “A.Ikromov” hududidagi K-4 kollektorida amalga oshirilayotgan ishlar bilan tanishdi. Topshiriqqa muvofiq hududda kollektor suvlaridan foydalangan holda sholi yetishtirishni ko‘paytirish maqsadida modernizatsiya ishlari amalga oshirilayotgan bo‘lib, mazkur hududning o‘zida 1 ta quvur, 7 ta “zatvor” qurish, 6,5 kilometr betonlash ishlarini amalga oshirish rejalashtirilgan.
Shuningdek, viloyat rahbari yoshlarga ajratilgan yer maydonlaridan foydalanish holati bilan ham tanishib, 7 gektarlik maydonda hosilni yig‘ib olish ishlarini ko‘zdan kechirdi.