Surxondaryo viloyatida og‘ir toifaga kiritilgan 114 ta mahallani kompleks rivojlantirish maqsadida arxitektura va qurilish yo‘nalishi talabalari tomonidan ishlab chiqilgan master-rejalar taqdimoti o‘tkazildi. Taqdimotlar Jarqo‘rg‘on, Qumqo‘rg‘on hamda Sho‘rchi tumanlarida bo‘lib o‘tdi.
Termiz davlat muhandislik va agrotexnologiyalar universiteti talabalari tomonidan ishlab chiqilgan loyihalarda infratuzilmani modernizatsiya qilish, tadbirkorlikni rivojlantirish, yangi ish o‘rinlari yaratish va aholi farovonligini oshirishga qaratilgan aniq takliflar ilgari surilgan.
Viloyat hokimi Ulug‘bek Qosimov loyihalarni ko‘rib chiqib, ularni amaliy dasturlar asosida bosqichma-bosqich hayotga tatbiq etish bo‘yicha topshiriqlar berdi. Shuningdek, Qumqo‘rg‘on tumanida ehtiyojmand oilalarga tomorqadan samarali foydalanish maqsadida kartoshka urug‘lari tarqatildi.
Mazkur tashabbuslar hududlarning ichki salohiyatini ochish, mahallalarni ixtisoslashtirish va aholi bandligini oshirishda muhim ahamiyat kasb etadi.
