Yoshlik chog‘ida bir bora bo‘lsa-da kurash tushmagan, o‘zini sportning qaysidir turida sinamagan yigit Surxondaryoda topilmasligi aniq. Negaki, surxon elining o‘g‘lonlari yoshligidanoq sportga oshno bo‘lib ulg‘ayadi. Jilla qursa, ko‘rpacha ustida aka-ukalar tugul, mitti qizchalar ham bir-biri bilan kurashib, raqibining yelkasini yerga tekkizishdan zavq tuyadi.
Voha kengliklarida mashg‘ulotlarda suyagi qotgan, quyoshning tig‘ida toblanib, chiniqqan yigitlar katta-katta davralarda ham, sport musobaqalarida ham doim ilg‘orlikka intiladi. Maydonga tushdimi, tamom, ortga qaytish yo‘q. Chunki maydon uzra raqib sportchi bilan nafaqat muvaffaqiyatni, g‘oliblikni talashadi, balki mard, qoni qaynoq o‘g‘lonlar or talashib, tug‘ilib o‘sgan yurti uchun ko‘krak kerib kurashadi.
Toshkent shahrida sportning Taekvondo ITF turi boʻyicha oʻtkazilgan birinchi Markaziy Osiyo chempionati musobaqasida Uzun tumani sport maktabi sportchisi Nematullo Jumayev faxrli 1-oʻrinni, Mahmud Mustafoyev 2-oʻrinlarni egallashdi hamda joriy yilning avgust oyida Qozogʻiston poytaxti Astana shahrida oʻtkaziladigan Jahon chempionatiga yoʻllanmani qoʻlga kiritishdi.
Haqgo‘y
