Viloyatning iqtisodiy rivojida, albatta, tadbirkorlarning ham munosib ulushi bor. O‘z navbatida soha vakillarining tashabbusi bilan yangidan-yangi faoliyat turlari yo‘lga qo‘yilib, ish o‘rni yaratilayotgan bo‘lsa, asosiysi bozorni ehtiyoj va talabga ko‘ra kerakli mahsulot bilan ham ta’minlab kelyapti.
Tajribali, uzoq yillar davomida mehnati ortidan o‘zi va o‘zgalarga, davlatga naf keltirib kelayotgan ishbilarmonlarning xizmati tahsinga sazovor. Tadbirkorlar kuni munosabati bilan tashkil etilgan marosimda esa bir guruh soha vakillariga “Faol tadbirkor” ko‘krak nishoni topshirildi.
Surxondaryo viloyati hokimi To‘ra Bobolov tadbirkorlarga ko‘krak nishonini ko‘ksiga qadab qo‘yar ekan, ularning keyingi ishlarida muvaffaqiyat va omad tiladi.
Inson mehnati ortidan sharaflansa, rahmat eshitsa, bundan ortiq xursandchilik bo‘lmasa kerak. Asosiysi, e’tibor va e’tirof jamiyat hayoti uchun daxldorlik hissini oshiradi, yanada shasht va ishonch bilan oldinga intilishga kuch beradi. Marosim sababchilarining har birining ko‘zlarida ana shunday kuch yog‘du taratayotgandek edi.
Hilol
