Nafis matoga tushirilgan naqshlar, tanlangan ranglar ajib ma’no kasb etgandek bo‘ladi. Ha, har bir naqshning o‘z ma’nosi bor. Ular egnimizda bo‘lganida husnimizga husn qo‘shadi. Do‘ppilar, jamalag-u qo‘shimcha aksessuarlar esa ko‘rgan ko‘zni quvnatishi aniq. Surxon zaminiga, ayniqsa, Boysunga yo‘li tushgan sayyoh va mehmonlar borki, ayni shu kashta-yu so‘zanalarimizga mahliyo bo‘lib, ularni xarid qilmay ketishmaydi.
Milliy mahsulotlarimiz aslida millatimizni, yurtimizni, qadriyatlarimizni dunyoga tanitishda eng yaxshi vosita bo‘lib xizmat qilyapti. Shuning uchun ham milliy hunarmandchiligimiz o‘lmaydi, ayollarimiz qo‘llarida sayqal topib, yanada jilolanadi. Ayni o‘sha mehr va muhabbat ila ushbu naqshlar yapon ayollarining-da ko‘nglidan joy olgan bo‘lsa, ajab emas. Do‘ppilarimiz, so‘zana-yu kashtalarimizning yaratilishiga qiziqish bildirgan “Yaponiya-O‘zbekiston” assotsiatsiyasi rahbari Yoshiko Kavabata tashabbusi bilan 1 yarim yildan buyon boysunlik qo‘ligul hunarmand ayollar Malika Podshoyeva va Nilufar Jo‘rayeva tomonidan yapon ayollari uchun onlayn tarzda mahorat darslari, o‘quv-amaliy mashg‘ulotlar o‘tkazib kelinayotir. Natija esa yomon emas. Qo‘llari kelishib qolgan yapon shogirdlar bugungi kunda o‘zlari ham bemalol matoga naqsh tushirishyapti. Ikki millat san’atini birlashtirib yaratgan namunalar esa e’tiborni tortmay qo‘ymaydi.
Ushbu yo‘nalishdagi amaliy hamkorlikni yanada kengaytirish maqsadida Tokio qishloq xo‘jaligi va texnologiyalar universiteti professori Yoshiko Kavabata boshchiligidagi delegatsiya Boysun tumaniga tashrif buyurdi. Mehmonlarning aytishiga qaraganda joriy yilning oxiriga qadar Tokio shahrida Boysun so‘zanachiligi kunlarini o‘tkazilar ekan. Bu bo‘yicha amaliy harakatlar esa allaqachon boshlab yuborilgan ekan.
S.Murodova
