Qishloq xo‘jaligi tarmoqlarida erishilayotgan yutuqlar hudud iqtisodiyotining barqaror rivojlanishida muhim o‘rin tutadi. Surxondaryo viloyatida pillachilik yo‘nalishida qo‘lga kiritilgan yuksak natijalar esa soha taraqqiyotining yaqqol ifodasiga aylandi.
Viloyat pillakorlari joriy yilning birinchi mavsumida 2 ming 344 tonnadan ortiq “kumush tola” yetishtirib, respublikada birinchilardan bo‘lib pilla yetishtirish bo‘yicha prognoz rejasini muvaffaqiyatli bajardi. Bu natija fidokorona mehnat va sohada joriy etilgan zamonaviy yondashuvlar samarasidir.
Ishlab chiqarishda voha iqlimiga mos serhosil mahalliy navlardan samarali foydalanilgani hamda pilla qurtini parvarishlashda ilg‘or texnologiyalar tatbiq etilgani har bir qutidan o‘rtacha 60 kilogrammdan hosil olish imkonini berdi.
Ayni paytda viloyatdagi qabul punktlarida pilla hosilini qabul qilish ishlari yuqori tashkiliy darajada davom etmoqda. Mazkur natijalar Surxondaryoda pillachilik sohasining izchil rivojlanayotgani va mehnatsevarlik an’analarining mustahkamlanayotganini ko‘rsatadi.
