Sog‘lom turmush tarzini keng targ‘ib etish va aholining jismoniy faolligini oshirish bugungi kunda dolzarb ahamiyat kasb etmoqda. Shu maqsadda “Sog‘lomlik marafoni” ommaviy tadbirlari doirasida 1-iyun kuni Termiz shahrida ko‘tarinki ruhdagi yurish marafoni tashkil etildi.
Erta tongda “Surxon Arena” sport majmuasidan start olgan “Sog‘lom hayot sari 5000 qadam” shiori ostidagi yurish tadbiri ishtirokchilarga yuqori kayfiyat va sportga bo‘lgan katta ishtiyoq ulashdi. Tadbirda Surxondaryo viloyati bojxona boshqarmasi xodimlari ham faol ishtirok etib, sog‘lom turmush tarzini targ‘ib qilishga o‘z hissalarini qo‘shishdi.
Marafon ishtirokchilari A.Navoiy ko‘chasidan boshlanib, I.Karimov shoh ko‘chasi orqali “Bolajon bog‘i” hududigacha piyoda yurishdi. Erta tongdagi jo‘shqin muhit, jamoaviy birdamlik va sportga bo‘lgan qiziqish tadbirga alohida ruh bag‘ishladi.
Mazkur ommaviy yurishlar aholida sog‘lom hayotga intilishni kuchaytirish, jismoniy faollikni oshirish hamda jamiyatda birdamlik va hamjihatlikni mustahkamlashga xizmat qiladi.
