Surxondaryo viloyatida “O‘zbekiston–2030” strategiyasini amalga oshirish jarayonida jamoatchilik nazorati muhim mexanizmga aylanmoqda. Ayniqsa, oziq-ovqat xavfsizligi va bolalar salomatligi kabi ustuvor yo‘nalishlarda olib borilayotgan ishlarni tizimli o‘rganish hududiy rivojlanish samaradorligini oshirishga xizmat qiladi.
“Yuksalish” harakati viloyat hududiy bo‘linmasi tomonidan o‘tkazilgan jamoatchilik eshituvida strategiyaning muhim yo‘nalishlari bo‘yicha amalga oshirilayotgan ishlar tahlil qilindi. Unda, avvalo, chorvachilik sohasidagi muammolar va go‘sht mahsulotlari narxining barqarorligini ta’minlash masalalari ko‘rib chiqildi. Mazkur yo‘nalishda viloyat veterinariya va chorvachilikni rivojlantirish boshqarmasi tomonidan amalga oshirilayotgan ishlar yuzasidan hisobot tinglandi.
Tahlillar shuni ko‘rsatdiki, chorvachilikda identifikatsiya, naslchilik va oziqa bazasini mustahkamlash masalalarida ayrim tizimli kamchiliklar mavjud. Bu esa bevosita bozor narxlariga va aholining oziq-ovqat xavfsizligiga ta’sir ko‘rsatmoqda. Shu nuqtayi nazardan, sohada raqamlashtirish va samarali boshqaruv mexanizmlarini joriy etish zarurati alohida ta’kidlandi.
Kun tartibidagi ikkinchi masala — bolalar o‘rtasida irsiy kasalliklarni aniqlash va oldini olish bo‘yicha skrining dasturlarining ijrosi bo‘ldi. Respublika ixtisoslashtirilgan ona va bola salomatligi markazi viloyat filiali mutaxassislari tomonidan amalga oshirilgan ishlar yuzasidan axborot berildi. Monitoring natijalariga ko‘ra, ayrim hududlarda skrining qamrovi yetarli darajada emasligi, tibbiy infratuzilma va kadrlar salohiyatini kuchaytirish zarurligi aniqlandi.
Mart oyida Termiz, Angor, Boysun, Jarqo‘rg‘on va Sherobod tumanlarida o‘tkazilgan jamoatchilik monitoringlari ushbu muammolarni joyida o‘rganish va aniq faktlar asosida baholash imkonini berdi. Bu esa qaror qabul qilish jarayonida ochiqlik va shaffoflikni ta’minlashga xizmat qilmoqda.
Jamoatchilik eshituvi yakunida aniqlangan muammolar bo‘yicha aniq taklif va tavsiyalar ishlab chiqildi. Bu kabi ochiq muhokamalar “O‘zbekiston–2030” strategiyasining hududlarda samarali amalga oshirilishini ta’minlash, mavjud kamchiliklarni bartaraf etish va aholi farovonligini oshirishda muhim ahamiyat kasb etadi. Eng asosiysi, jamoatchilik nazoratining kuchayishi davlat dasturlarining natijadorligini oshirishda hal qiluvchi omil bo‘lib xizmat qilmoqda.
