Turkiyaning Antaliya shahrida dzyudo bo‘yicha kadetlar o‘rtasida o‘tkazilayotgan Millennium Team Cadet European Cup 2026 xalqaro turnirining ilk kungi bahslarida O‘zbekiston vakili, jarqo‘rg‘onlik sportchi Bobur Yusupov yuksak natija qayd etdi.
55 kilogramm vazn toifasida tatamiga chiqqan yosh dzyudochi musobaqa davomida barcha raqiblarini ishonchli tarzda mag‘lub etib, finalgacha yetib bordi. Hal qiluvchi bahsda ham ustunlikni qo‘ldan boy bermagan Bobur Yusupov oltin medalni qo‘lga kiritib, turnir chempioniga aylandi.
Sportchining ishonchli va faol kurashi uning texnik tayyorgarligi hamda g‘alabaga bo‘lgan intilishini yaqqol namoyon etdi. Ushbu muvaffaqiyat nafaqat yosh sportchining shaxsiy yutug‘i, balki mamlakatimiz dzyudo maktabining xalqaro maydondagi navbatdagi yutug‘i sifatida e’tirof etilmoqda.
