Sariosiyo tumanidagi Sangardak turizm markazida tog‘ dor yo‘li, mehmonxonalar, restoranlar, kapsula uylar, bungalovlar, mehmon uylari, savdo bozorchasi, avtoturargohlar hamda turli xizmat ko‘rsatish obyektlarini barpo etish ishlari jadal sur’atlarda davom etmoqda.
Tuman hokimi Odiljon Yaqubov Sangardak mahallasiga tashrifi davomida mas’ullar bilan birgalikda turizm markaziga kirish qismida barpo etiladigan stella, infratuzilma obyektlari va boshqa turizm loyihalarining amalga oshirilishini o‘rgandi. Dastlab tog‘ dor yo‘li qurilishi ko‘zdan kechirilib, ishlarni jadallashtirish hamda loyihani belgilangan muddatda foydalanishga topshirish yuzasidan tegishli ko‘rsatmalar berildi.
Shuningdek, tog‘ hududida barpo etilayotgan zamonaviy dam olish maskanlari loyihalari o‘rganilib, qurilish sifatini ta’minlash, me’yorlarga qat’iy rioya etish va ishlarni o‘z vaqtida yakunlash masalalari muhokama qilindi. Hududni obodonlashtirish, yashil maydonlarni kengaytirish va ekologik barqarorlikni ta’minlash maqsadida ko‘chat ekish ishlari ham amalga oshirildi.
Ta’kidlanishicha, mazkur turizm majmuasi kelgusida hudud iqtisodiyotini rivojlantirish, yangi ish o‘rinlari yaratish hamda Sangardakni mamlakatimizdagi yirik sayyohlik maskanlaridan biriga aylantirishga xizmat qiladi.
