Maxsus avtomatlashtirilgan foto va video qayd etish texnika vositalari orqali aniqlanadigan ma’muriy huquqbuzarliklarning qat’iy ro‘yxati tasdiqlandi. Shuningdek, ushbu qoidabuzarliklar bo‘yicha ma’muriy jazo qo‘llash muddatlari ham aniq belgilandi.
Yangi tartibga muvofiq, xavfsizlik kamaridan foydalanmaslik, transport vositasini boshqarish vaqtida telefondan foydalanish, belgilangan tezlikni soatiga 20 kilometrgacha oshirish, to‘xtash va to‘xtab turish qoidalarini buzish kabi holatlar foto va videoqayd qurilmalari orqali qayd etiladi.
Qoidalarga ko‘ra, agar huquqbuzarlik foto yoki video qayd etish vositalari orqali aniqlansa, ma’muriy jazo huquqbuzarlik sodir etilgan kundan boshlab bir oy ichida qo‘llanadi. Qaror ustidan shikoyat berilgan taqdirda esa jazo bir yil muddatdan kechiktirmay qo‘llanishi mumkin.
