2026-yil 1-yanvardan boshlab yakka tartibdagi tadbirkorlar (YATT) hamda o‘zini o‘zi band qilgan shaxslar elektron to‘lovlarni qabul qilish uchun maxsus QR-kodga ega bo‘lishlari shart. Endilikda oddiy karta o‘tkazmalari orqali to‘lov qabul qilishga yo‘l qo‘yilmaydi.
Yangi tartibga ko‘ra, quyidagi holatlar uchun jarimalar belgilanadi:
QR-kod bo‘lmasdan ishlash terminaldan foydalanmaslikka tenglashtiriladi va 5 million so‘m jarima solinadi;
Boshqa shaxs nomiga rasmiylashtirilgan QR-koddan foydalanish esa 20 million so‘m jarima bilan jazolanadi.
Mazkur o‘zgarishlar Soliq kodeksining 221-moddasiga kiritilgan bo‘lib, tadbirkorlar faoliyatida to‘lovlar shaffofligini ta’minlashga qaratilgan.
Shu sababli YATT va o‘zini o‘zi band qilgan shaxslarga jarimalarning oldini olish uchun o‘z faoliyatida qonuniy rasmiylashtirilgan QR-koddan foydalanish tavsiya etiladi.
