So‘nggi yillarda suv resurslaridan oqilona foydalanish, suv yo‘qotishlarini kamaytirish va irrigatsiya tizimining samaradorligini oshirish masalalari dolzarb ahamiyat kasb etmoqda. Muzrabot tumanida ham ushbu yo‘nalishda izchil va tizimli ishlar amalga oshirilmoqda.
Tumanda ishchi guruh tuzilib, barcha hududlarda ariqlar va kanallarni betonlash jarayonlari jadallik bilan davom ettirilmoqda. Ushbu sa’y-harakatlar natijasida suvning isrof bo‘lishi keskin kamaymoqda, ekin maydonlariga suv yetkazib berish sifati yaxshilanmoqda va hosildorlikning oshishi uchun mustahkam zamin yaratilmoqda.
Muzrabot tuman Fermerlar kengashi tashabbusi bilan tumanning “Navbahor” hududi, “Murodbek Agro servis” fermer xo‘jaligida amaliy seminar tashkil etildi. Tadbirda agronomlar, fermerlar va soha mutaxassislari ishtirok etib, irrigatsiya tizimlarini modernizatsiya qilish, suv tejamkor texnologiyalarni joriy etish va hosildorlikni oshirish bo‘yicha tajriba almashishdi.
Ushbu keng qamrovli tashabbuslar tuman qishloq xo‘jaligi samaradorligini oshirish, suv resurslarini tejash va aholi farovonligini ta’minlashga xizmat qilib, kelajak hosiliga mustahkam asos bo‘lmoqda.
