Tadbirkorlar bilan ochiq muloqot

Tadbirkorlikni rivojlantirish, ishbilarmonlik muhitini yanada yaxshilash hamda tadbirkorlarning qonuniy manfaatlarini ta’minlash bugungi kunning muhim vazifalaridan biridir.
Shu maqsadda Angor tumanida tadbirkorlarning murojaatlarini tinglash, ularni qiynayotgan masalalarni chuqur o‘rganish va mavjud muammolarga amaliy yechim topishga qaratilgan tadbirkorlar qabuli tashkil etildi.
Qabulni tuman hokimi Qosim Mardonov, “Mikrokreditbank” ATB Boshqaruvi raisi o‘rinbosari U. Jumaniyazov hamda bankning viloyat hududiy boshqarmasi boshlig‘i B. Hasanov o‘tkazdi.
Muloqot davomida tadbirkorlar ishlab chiqarish va xizmat ko‘rsatish yo‘nalishlarini kengaytirish, yangi loyihalarni amalga oshirish, moliyaviy ko‘mak va kredit mablag‘laridan foydalanish, yer ajratish hamda infratuzilma bilan bog‘liq masalalar yuzasidan o‘z murojaatlarini bildirdilar.
Har bir murojaat alohida va manzilli tartibda ko‘rib chiqildi. Tadbirkorlarga mavjud imkoniyat va imtiyozlar yuzasidan kerakli  tushuntirishlar berilib, qo‘shimcha o‘rganish masalalari bo‘yicha mas’ul rahbar va mutasaddilarga aniq topshiriqlar berildi.
Bundan tashqari  tadbirkorlik subyektlari uchun qulay shart-sharoit yaratish, faoliyatini kengaytirishga ko‘maklashish, yangi ish o‘rinlarini yaratish va investitsiyaviy loyihalarni hayotga tatbiq etish masalalariga alohida e’tibor qaratildi.
Muhimi, hech bir murojaat e’tiborsiz qolmadi. Ko‘tarilgan masalalarning ijrosi mas’ullar zimmasiga yuklatilib, ularning bajarilishi nazoratga olindi.
Tadbirkorlarning tashabbuslarini qo‘llab-quvvatlash, faoliyatiga to‘sqinlik qilayotgan muammolarni o‘z vaqtida aniqlash va ularni joyida bartaraf etish borasidagi ishlar izchil davom ettiriladi.