“Yozgi universitet” loyihasi doirasida Xitoyning Shinjon-Uyg‘ur avtonom hududidagi Shihezzi universitetining doktorant, magistrant va bakalavr talabalaridan iborat guruh Termiz davlat muhandislik va agrotexnologiyalar universitetida bo‘ldi.
Tashrif davomida xorijlik talabalar zamonaviy laboratoriyalar, innovatsion markazlar va o‘quv-amaliy bazalar faoliyati bilan tanishdilar. Robototexnika xonasida sun’iy intellekt qurilmalari asosida mashg‘ulotlar o‘tkazildi, elektromobillar markazida esa ekologik transport vositalari namoyish etildi.
Shuningdek, talabalar Ingichka tolali paxtachilik ilmiy-tadqiqot instituti va Surxondaryo tajriba stansiyasida bo‘lib, urug‘chilik hamda sabzavotchilik sohasidagi yangiliklarni o‘rganishdi. Universitetning agronomiya, seleksiya va urug‘chilik kafedrasi tomonidan tashkil etilgan mahorat darsida viloyat paxtachiligidagi yutuqlar muhokama qilindi. Bundan tashqari, ular Surxon geologiyasi muzeyi, Arxeologiya muzeyi, Sulton Saodat majmuasi va Fayoztepa yodgorligiga tashrif buyurib, mintaqaning boy tarixi bilan yaqindan tanishdilar.
Mazkur tashrif “Yozgi universitet” loyihasining amaliy va akademik yutuqlarini namoyon etdi hamda Termiz davlat muhandislik va agrotexnologiyalar universiteti bilan Xitoyning Shihezzi universiteti o‘rtasidagi xalqaro hamkorlikni mustahkamladi.
