Termiz shahrining “Jo‘yjangal” mahallasida hashar ko‘tarinki kayfiyat bilan o‘tkazilmoqda. Mahalla ahli bir tan-u bir jon bo‘lib, o‘z hududini obod etish, ko‘chalarni tozalash va ko‘rkamlashga bel bog‘lagan. Har qarich yerda ahillik va hamjihatlik ruhi sezilmoqda.
Hashar davomida hovlilar va ko‘chalar tartibga keltirilmoqda, daraxt va gullar parvarish qilinmoqda, shuningdek, umumiy tozalik ishlari amalga oshirilmoqda. Ayniqsa, yoshlar va nuroniylarning birgalikda faol ishtiroki mahallaga yanada fayz bag‘ishlamoqda.
Shu bilan birga, xonadonlarda oshlar damlanib, qo‘shnilar o‘zaro mehr-oqibat ila dasturxon atrofida jamlanib, kelayotgan bayram shukuhiga tayyorgarlik ko‘rishmoqda.
