Yoshlarni oilaviy hayotga tayyorlasak…

Bugun negadir ajrimlar, oilaviy nizolar haqida bot-bot to‘xtalamiz. Muammoning ildizini qidirganimizda esa yoshlarning oilaviy hayotga hali tayyor emasligi ochiqlanib qoladi. Bolani savodini oshirish uchun qo‘liga qalam tutqazib yozishni, o‘qishni o‘rgatganimiz kabi, endigina oila qurish ostonasida turgan yoshlarga ham oilaviy hayot haqida biroz tushuncha bersak, balki ayni muammolar kelib chiqmasmidi…
O‘zbekiston Respublikasi Vazirlar Mahkamasining 2020-yil 31-dekabrdagi “Oila institutini yanada rivojlantirish va yoshlarni oilaviy hayotga tayyorlash chora-tadbirlari to‘g‘risida”gi qaroriga asosan Uzun tumanida “Yoshlarni oilaviy hayotga tayyorlash markazi”ning navbatdagi o‘quvi bo‘lib o‘tdi. Dars jarayonlarda tumandagi malakali o‘qituvchi va shifokorlar, otinoyilar, psixologlar, imom-xatib ishtirok etdi.
Oila qurish arafasida turgan yoshlarga dastur asosida belgilangan mavzular bo‘yicha darslar o‘tilib, dars yakunida tuman hokimi o‘rinbosari S.Gulboyeva hamda FHDYO bo‘lim boshlig‘i Z.Jumayeva tomonidan yoshlarga sertifikatlar topshirildi.