Buxoro bug‘ulari yana bittaga ko‘paydi

Xushxabarning qanoti bo‘ladi deyishganidek, yangiliklar yashin tezligida tarqaladi. Xuddi shunday, Termiz hayvonot bog‘ida saqlanayotgan noyob turdagi Xongul — Buxoro bug‘usi bolalagani ko‘pchilikni quvontirdi. Aytish kerakki, hozirda jonivorning salomatligi yaxshi, u veterinarlarning nazorati ostida.
Bugungi kunda hayvonot bog‘ida 4 bosh — 2 bosh erkak, 2 bosh urg‘ochi Buxoro xonguli saqlanmoqda. Eslatish joizki, Xongul (Buxoro bug‘usi) yo‘q bo‘lib ketayotgan, lokal tarqalgan kenja tur hisoblanadi. O‘tmishda Sirdaryo va Amudaryo havzalarining barcha to‘qayzorlarida keng tarqalgan.
Hozirda Amudaryo vodiysining yuqori (Surxondaryo viloyati) va o‘rta (Buxoro viloyati Qizilqum qo‘riqxonasi) oqimida yashovchi, Zarafshon Milliy tabiat bog‘i va Quyi Amudaryo biosfera rezervati, shuningdek, Zarafshon daryosi yuqorisida – O‘zbekiston va Tojikiston chegarasidagi aborigen populyatsiyalari, introduksiya va reintroduksiya yo‘li bilan yuzaga kelgan sun’iy guruhlari mavjud.