Yosh shaxmatchilar bo‘sh kelishmadi

Sport nafaqat insonni jismonan chiniqtiradi, balki aql-idrokni charxlab, o‘ylashga majbur etadi. Shaxmatda xuddi shunday. Shu sababdan ham yoshlarni shaxmatga jalb etishga katta e’tibor qaratilmoqda.
Ayni maqsadda Angor tumanidagi mavjud maktabgacha ta’lim tashkilotlari tarbiyalanuvchilari o‘rtasida shaxmat musobaqasining tuman bosqichi o‘tkazildi. Tarbiyalanuvchilarning iqtidorlarini aniqlash, yanada rivojlantirish, sportga bo‘lgan qiziqishini shakllantirish hamda ularning jamiyatda moslashishiga yordam berish ko‘zlangan musobaqa qizg‘in tus oldi.
Musobaqada tumandagi maktabgacha ta’lim tashkilotlarining 5-7 yosh toifasidagi 50 nafardan ziyod tarbiyalanuvchilari o‘zaro bellashdilar. To‘g‘ri, endigina shaxmat o‘ynashni, o‘yin qonun-qoidalarini o‘rgangan bolajonlardan ko‘z ko‘rib, quloq eshitmagan yurishlarni kutish to‘g‘ri emas. Ammo asosiysi, ular bo‘sh kelishmadi. Maroq bilan murosasiz bahslarga kirishishdi.
Yakunda g‘oliblar diplom va sovg‘alar bilan taqdirlandi.