Bahodirlar sinashta bo‘ldi

Sport insonni chiniqtiradi. Qolaversa, hayotga qarashlarni ham o‘rganadi. Huda-behudaga kuch ishlatmaslik, har qanday vaziyatda og‘ir-bosiqlik qilishga-da o‘rgatadi. Shunday ekan, spot zarurat, sport sevimli mashg‘ulot bo‘lmog‘i lozim. Bu fikrlar sportga yondashmaganlar uchun erish tuyilishi mumkin, ammo sportga oshno tutinganlar tasdiqlashlari aniq, ishonavering.
Bahodirlar o‘yini bo‘lmish sport turlari ham sportchidagi iqtidorni, kuchni to‘g‘ri yo‘naltirishni, taqsimlashni o‘rgatadi. Axir tosh ko‘tarish ham bir mahorat. Bu ishni birinchi bor takrorlashga harakat qiluvchilar uddalay olmasligi aniq. Sababi tosh ko‘tarishni-da, o‘z texnikasi, usul va sirlari bo‘ladi. Ayni sport turlarini ommalashtirish maqsadida esa doimiy tarzda musobaqalar tashkil etib kelinmoqdaki, bu bilan unga qiziquvchi yoshlar qamrovi oshishiga erishilmoqda.
O‘zbekiston Respublikasi Prezidentining “Etnosport turlarini ommalashtirish va rivojlantirish chora-tadbirlari” to‘g‘risidagi 2022-yil 25-maydagi PQ-259-son qarorida belgilangan vazifalar ijrosini ta’minlash maqsadida Jarqo‘rg‘on tuman sport maktabida etnosportning Bahodirlar o‘yinlari va tosh ko‘tarish turlari bo‘yicha tuman birinchiligi musobaqasi bo‘lib o‘tdi.
Musobaqa qizg‘in va murosasiz bahslarga boy tarzda o‘tkazildi. Yakuniy natijalarga ko‘ra, Otabek Rustamov 1-o‘rinni egalladi. G‘oliblar tuman sport maktabining diplom hamda esdalik sovg‘alari bilan taqdirlandi.