Ilmiy ekspeditsiya Boysunda davom etdi

Xalq og‘zaki ijodini o‘rganish tadqiqotchidan O‘zbekiston bo‘ylab kezishni, chekka-chekka qishloq va ovullarda bo‘lishni talab etadi, xalq bilan suhbatda o‘zlari uchun katta yangiliklar, kashfiyotlar qilishi mumkin. Ayni yo‘nalishda ilmiy tadqiqotlar olib borgan ustozlarimizning faoliyatlari misolida anglaganmizki, bu qizg‘in va maroqli jarayon. Mehnat, mashaqqat, vaqt talab etsa-da, milliy san’atimizni o‘rganish, uning rivoji, avlodlarga bus-butun topshirish uchun hissa qo‘shish har bir izlanuvchini g‘ururlantirishi, o‘zini buyuk ishga bel bog‘lagandek his etishi shubhasiz.
Ayni maqsadda Madaniyatshunoslik va nomoddiy meros ilmiy-tadqiqot institutining bir guruh xodimlari hududlarda olib borilayotgan mahalliy etnofolklor ekspeditsiyalarni Surxondaryo viloyatida davom ettirishmoqda. Ilmiy ekspeditsiya Boysun tumanida Boysun madaniy muhiti namunalarini tadqiq qilishdan boshlandi. Jumladan, hududning eng qadimiy bo‘lgan musiqa sozlari chanqovuz, do‘mbira, ushpullak, tabiiy ipaklardan tikilgan boysun do‘ppilari singari hunarmandlar ishlari o‘rganildi.