Pensiya “avtomatik” tarzda tayinlanadi

Pensiya inson mehnatining mukofoti bo‘lsa kerak. O‘zini kasbu koriga baxshida etgan inson, vaqti-muddati kelib, pensiya oladi, boshqacha aytganda, mehnatlarining mukofoti bilan taqdirlanadi. Xolbuki, pensiya yoshiga yetgan fuqarolar bir talay hujjatlar va ma’lumotlarni to‘plab, bir muddat vaqtini sarflashiga to‘g‘ri keladi. Ba’zida bu sarson-sargardonchilikka sabab bo‘lishi ham bor gap. Ba’zan avval ishlagan joylaridan ma’lumotlari yetmagani uchun ish staji yetmasdan, oqibatda yana ishlashlariga to‘g‘ri kelish holati ham va yoki pensiya tayinlanishida hisoblash miqdoriga ta’sir qilishi ham mumkin.
Ana shunday holatlarga chek qo‘yish maqsadida 2025-yil 1-martdan boshlab 60 yoshga yetgan erkaklarga va 55 yoshga yetgan ayollarga pensiyalar, shu kunning o‘zida “avtomatik” tarzda, ya’ni biror-bir turdagi hujjat talab etmagan holda tayinlanadi. Bunda, shaxsga oid ma’lumotlar (fuqaroning yoshi, jinsi), ish staji, ish haqi (to‘langan ijtimoiy soliq summasi) va oila tarkibi (turmush o‘rtog‘i va farzandlari) Adliya vazirligi, Bandlik vazirligi hamda Soliq qo‘mitasining elektron bazalaridan olinadi.
Natijada fuqarolarga pensiya tayinlash uchun qo‘shimcha hujjatlar yig‘ish hamda o‘zi istiqomat qiluvchi Pensiya jamg‘armasining hududiy bo‘linmasiga murojaat qilish talab etilmaydi hamda pensiya yoshiga yetgan fuqaroga, shu kunning o‘zida pensiya “avtomatik” tarzda tayinlangandan so‘ng, fuqaroning mobil aloqa vositasiga ma’lumot yuboriladi.