Bolaning har tomonlama rivojlanishida o‘yin faoliyati muhim o‘rin tutadi. O‘yin orqali bolalar atrof-muhitni anglaydi, mustaqil fikrlash, muloqot qilish va yangi ko‘nikmalarni egallashni o‘rganadi. Shu jihatdan “Bola, o‘yin va pedagog” loyihasi doirasida tashkil etilayotgan seminarlar maktabgacha ta’lim jarayonida o‘yin usullarini samarali qo‘llashga xizmat qiladi.
Surxondaryo viloyatida loyiha doirasida namunaviy dastur asosida seminarlar o‘tkazilmoqda. Ularda Maktabgacha va maktab ta’limi vazirining 2026-yil 10-sentabrdagi 340-sonli qarorida belgilangan vazifalar, loyihaning mazmun-mohiyati va uni amaliyotga tatbiq etish masalalari muhokama qilinmoqda.
Seminar ishtirokchilariga bolalar rivojlanishida o‘yinning ahamiyati, mashg‘ulotlarni samarali tashkil etish, namunaviy faoliyatlarni amaliyotda qo‘llash hamda zarur ish hujjatlarini to‘g‘ri yuritish bo‘yicha tushunchalar berilmoqda. Bu bilimlar pedagoglarga mashg‘ulotlarni bolalarning yosh xususiyatlariga mos tashkil etish va ta’lim jarayonini yanada mazmunli olib borishda yordam beradi.
