O‘zbekistonning xorijiy davlatlar bilan ta’lim sohasidagi hamkorligi kengayib, yoshlar uchun mamlakatimizning yetakchi oliy ta’lim muassasalarida tahsil olish imkoniyatlari ortmoqda. Qozog‘iston, Qirg‘iziston, Tojikiston va Mo‘g‘uliston fuqarolariga O‘zbekiston davlat oliy ta’lim tashkilotlarida o‘qish uchun jami 70 ta grant ajratildi.
Ajratilgan grantlar doirasida nomzodlar tanlov asosida saralanadi. Ta’lim o‘zbek va rus tillarida olib boriladi. Nomzodlardan tanlangan ta’lim tilini bilish, shuningdek, ikkita mutaxassislik fanidan sinov topshirish talab etiladi.
Qirg‘iziston fuqarolari uchun hujjatlar 2026-yil 22-avgustga qadar qabul qilinadi. Kirish sinovlari 24-avgust kuni O‘sh davlat universitetida o‘tkaziladi.
Mazkur tashabbus xorijiy yoshlarning O‘zbekiston oliy ta’lim tizimida tahsil olish imkoniyatlarini kengaytirish, ta’lim sohasidagi xalqaro hamkorlikni mustahkamlash va mamlakatimiz oliygohlarining mintaqadagi nufuzini oshirishga xizmat qiladi.
