Sariosiyo tumanida maktabgacha ta’lim qamrovini kengaytirish va bolalarni bog‘cha bilan qamrab olish darajasini 80 foizga yetkazish bo‘yicha Prezident topshiriqlari ijrosi doirasida yangi loyiha amalga oshirilmoqda.
Galabutta mahallasidagi 45-sonli umumta’lim maktabi hududida davlat-xususiy sherikchilik asosida 150 o‘rinli zamonaviy maktabgacha ta’lim tashkiloti qurilishiga start berildi. Tashabbus bo‘sh turgan yer maydonidan samarali foydalanish va hududda bolalar uchun qulay ta’lim muhitini yaratishga qaratilgan.
Loyiha bilan tanishgan tuman hokimi Odiljon Yaqubov qurilish ishlarining sifatli bajarilishi, muassasaning zamonaviy jihozlar bilan ta’minlanishi hamda tarbiyalanuvchilar uchun barcha zarur sharoitlar yaratilishi muhimligini ta’kidladi.
Mazkur bog‘cha Sariosiyoda maktabgacha ta’lim infratuzilmasini kengaytirish, bolalarni sifatli ta’lim bilan qamrab olish va davlat-xususiy sheriklik mexanizmlarini amalda rivojlantirish yo‘lidagi muhim qadamlardan biri bo‘lib xizmat qiladi.
