Sho‘rchi tumanining “Qoqaydi” mahallasida yashovchi Dilobar Siddiqova o‘z mehnatsevarligi va tashabbuskorligi bilan ibrat bo‘lib kelmoqda. U sutni qayta ishlash orqali tabiiy va sifatli mahsulotlar ishlab chiqarayotgan oilaviy tadbirkorlikni yo‘lga qo‘ygan.
Uning faoliyati shuni ko‘rsatadiki, har bir ayol o‘z tashabbusi va mehnati bilan nafaqat daromad manbaiga ega bo‘lishi, balki jamiyatda munosib o‘rin egallashi ham mumkin. Tadbirkor ayol marrani katta olgan, yaqin bir necha yil ichida ishlab chiqarish hajmini kengaytirish, mahsulot turlarini ko‘paytirish hamda yana bir necha xotin-qizlarni ish bilan ta’minlashni maqsad qilgan.
“Mehnat qilgan insonning rizqi barakali bo‘ladi. Sifat va tozalik biz uchun eng muhim,” deydi u.
Mazkur tashabbus xotin-qizlarning iqtisodiy faolligini oshirish, oilaviy tadbirkorlikni rivojlantirish va mahallalarda yangi ish o‘rinlari yaratishda muhim ahamiyat kasb etmoqda.
