Hududlarda aholi bandligini ta’minlash, tomorqadan samarali foydalanish va oilalar daromadini oshirish borasidagi ilg‘or tajribalarni ommalashtirish bugungi kunning muhim vazifalaridan biridir. Shu maqsadda Qiziriq tumanining Yangi hayot, Kunchiqish, Zarabot va Yangikent mahallalari raislari, hokim yordamchilari, mahalla faollari hamda nuroniylari Angor tumanining Ilg‘or va Bahor mahallalarida bo‘lib, amalga oshirilayotgan ishlar bilan yaqindan tanishdilar.
Tashrif davomida mehmonlar aholi xonadonlarida bo‘lib, tomorqadan unumli foydalanish, yetishtirilgan mahsulotlarni eksportga yo‘naltirish, “Agro Star” loyihasi doirasidagi faoliyat hamda polietilen savat ishlab chiqarish jarayonlarini ko‘zdan kechirdilar.
Shuningdek, mahallalarda tadbirkorlikni rivojlantirish, yangi ish o‘rinlari yaratish va tomorqachilik orqali iqtisodiy samaradorlikka erishish borasida o‘zaro fikr almashilib, ilg‘or tajribalarni boshqa hududlarda ham keng joriy etish masalalari muhokama qilindi.
