Mamlakatimizda ta’lim tizimini rivojlantirish, yosh avlod uchun zamonaviy va qulay o‘quv muhitini yaratishga qaratilayotgan e’tibor amaliy ishlarda yaqqol namoyon bo‘lmoqda. Ayniqsa, hududlarda yangi maktab binolarining bunyod etilishi va mavjud ta’lim maskanlarining rekonstruksiya qilinishi o‘quvchilarning sifatli ta’lim olishi uchun muhim omil bo‘lib xizmat qilmoqda.
Sariosiyo tumanidagi 23-sonli umumta’lim maktabining yangi o‘quv binosi foydalanishga topshirildi. Ochilish marosimida tuman hokimligi, maktabgacha va maktab ta’limi bo‘limi mas’ullari, ota-onalar hamda keng jamoatchilik vakillari ishtirok etdi.
Tadbir davomida mehmonlar rekonstruksiya qilingan maktabda yaratilgan zamonaviy shart-sharoitlar bilan yaqindan tanishdilar. Yangi binoda yorug‘ va qulay sinf xonalari, zamonaviy jihozlar hamda sifatli ta’lim olish uchun barcha zarur imkoniyatlar yaratilgan.
Mazkur ta’lim maskani o‘quvchilarning puxta bilim olishi, zamonaviy kasb-hunarlarni egallashi hamda kelajakda yurt ravnaqiga munosib hissa qo‘shadigan barkamol avlod bo‘lib voyaga yetishida muhim ahamiyat kasb etadi.
