O‘zbek tilining xalqaro nufuzini oshirish va xorijdagi vatandosh yoshlarning ona tiliga bo‘lgan qiziqishini kuchaytirish maqsadida yangi tartib joriy etildi. Hukumatning 250-son qarori bilan Alisher Navoiy nomidagi xalqaro o‘zbek tili olimpiadasini tashkil etish va o‘tkazish tartibi tasdiqlandi.
Mazkur olimpiadada 14–18 yoshdagi xorijda yashovchi vatandosh o‘quvchilar yakka yoki jamoaviy tarzda ishtirok etishi mumkin. Bellashuv har yili ikki bosqichda — test va yozma ish shaklida o‘tkaziladi.
Ishtirokchilar o‘zbek tili, adabiyoti va ijodiy fikrlash bo‘yicha bilimlarini sinovdan o‘tkazadilar. Yozma bosqichda esa ishtirokchilar tanlangan mavzu asosida esse yozadi.
Olimpiada g‘olib va sovrindorlari medal, diplom hamda esdalik sovg‘alari bilan taqdirlanadi. Ushbu tashabbus xorijdagi yoshlar orasida o‘zbek tili va milliy qadriyatlarga hurmatni yanada mustahkamlashga xizmat qiladi.
