Aholi orasida sog‘lom turmush tarzi va ekologik madaniyatni keng targ‘ib qilish maqsadida “Eko-faol fuqaro” platformasi ishga tushirildi. Endilikda foydalanuvchilar kunlik piyoda yurish orqali rag‘bat olish imkoniga ega bo‘ladi.
Ekologiya qo‘mitasi ma’lum qilishicha, platforma Prezident qarori asosida “10 ming qadam piyoda” tashabbusini qayta tiklash doirasida yo‘lga qo‘yildi. Ilova 1-maydan boshlab faoliyat yuritmoqda.
Foydalanuvchilar “Eko-faol fuqaro” platformasini App Store va Play Market orqali yuklab olib, kunlik qadamlarini kuzatishi hamda belgilangan me’yor asosida rag‘bat olishi mumkin.
Mazkur loyiha fuqarolarni jismoniy faollikka undash, sog‘lom hayot tarzini shakllantirish va atrof-muhitga mas’uliyat bilan munosabatda bo‘lishni kuchaytirishga xizmat qiladi.
