O‘zbekistonda paxta va bug‘doy yetishtiruvchilarni qo‘llab-quvvatlashga qaratilgan yangi mexanizm joriy qilindi. Prezident Farmoniga ko‘ra, 2026-yil hosilidan boshlab fermer va klasterlarga to‘langan kredit foizlarining bir qismi davlat tomonidan kompensatsiya qilinadi.
Yangi tartibga muvofiq, paxta yetishtirish uchun olingan imtiyozli kreditlarni muddatida qaytargan xo‘jaliklarga foiz to‘lovlarining bir qismi qoplab beriladi. Kredit yil yakunigacha to‘liq yopilganda esa kompensatsiya miqdori yanada oshadi. Bug‘doy yetishtiruvchilar ham kreditlarni o‘z vaqtida so‘ndirgan taqdirda foiz xarajatlari uchun davlat ko‘magiga ega bo‘ladi.
Shuningdek, paxta-to‘qimachilik klasterlari va to‘qimachilik korxonalariga tijorat kreditlari bo‘yicha ham qo‘shimcha yengilliklar berildi.
Mazkur mexanizm qishloq xo‘jaligida moliyaviy yukni kamaytirish, fermerlarning aylanma mablag‘larini saqlab qolish hamda paxta va g‘alla yetishtirish samaradorligini oshirishda muhim ahamiyat kasb etadi.
