Qumqo‘rg‘on tumanida pilla mavsumi dastlabki muvaffaqiyatlar bilan boshlandi. Tumandagi bir qator ilg‘or fermer xo‘jaliklari belgilangan rejani ortig‘i bilan bajarib, yetishtirilgan hosilni tantanali ravishda pilla qabul qilish maskaniga topshirdi.
Xususan, “Chayontepalik Sanjarbek”, “Sultan Azizbek Paxtakori”, “Parloq 777” hamda “Olmapoya Paxtakori” fermer xo‘jaliklari mavsumda birinchilar qatorida rejani muvaffaqiyatli ado etdi. “Chayontepalik Sanjarbek” fermer xo‘jaligi esa 405 kilogrammlik rejani 453 kilogramm bilan bajardi.
Tadbirda tuman hokimi Farrux Xoliqov pillakorlarning zahmatli mehnatini e’tirof etib, ularni qutladi. Ta’kidlanganidek, pilla yetishtirish nafaqat daromad manbai, balki sabr, mehnat va fidoyilik mahsuli hisoblanadi.
Ma’lumotlarga ko‘ra, joriy mavsumda tumanda 301 tonna pilla yetishtirish rejalashtirilgan bo‘lib, ilk natijalar ushbu marralarga muvaffaqiyatli erishilishidan dalolat bermoqda.
