Termiz shahrida “Burch, jasorat, matonat” shiori ostida Sariosiyo voqealaridagi jangovar harakatlarda ishtirok etib, Vatan himoyasi yo‘lida mardlarcha halok bo‘lgan serjant Muhiddin Eshtemirov xotirasiga bag‘ishlangan sportning qo‘l jangi turi bo‘yicha “Xotira turniri” yuqori saviyada tashkil etildi.
Turnirda Termiz shahridagi umumta’lim maktablari o‘quvchilari faol qatnashib, o‘zlarining jismoniy tayyorgarligi, chaqqonligi va jangovar mahoratini namoyish etdi. Bahslar davomida yosh qo‘l jangi ustalarining tezkor harakatlari, aniq zarbalari va himoyalanish usullari tomoshabinlarda katta taassurot qoldirdi. Ayniqsa, ayrim ishtirokchilarning professional sportchilarga xos qat’iyat va iroda bilan harakat qilgani musobaqaga yanada shiddat bag‘ishladi.
Musobaqa nafaqat sport bellashuvi, balki qahramonlar xotirasiga hurmat va ehtirom ramziga aylandi. Turnir davomida yoshlar uchun mardlik, fidoyilik va Vatanga sadoqatning haqiqiy namunasi yana bir bor yodga olindi.
Yakunda faxrli o‘rinlarni egallagan ishtirokchilar diplom, medal hamda esdalik sovg‘alari bilan taqdirlandi.
